(روز نامہ قدس ۔آنلائن خبر رساں ادارہ ) لبنان کی جانب سے صہیونی ریات اسرائیل میں میزائل داغے جانے کے بعد صہیونی فوج نے غزہ کے مختلف علاقوں میں فلسطینی مزاحمت کاروں اور ان کے ٹھکانوں کو نشانہ بنانے کا دعویٰ کیا ہے۔
تفصیلات کے مطابق غیر قانونی صہیونی ریاست اسرائیل نے دعویٰ کیا ہے کہ لبنان کے سرحدی علاقوں سے اسرائیل میں 34 راکٹ فائر کئے گئے جس میں سے 25 کو اسرائیل کے فضائی دفائی نظام نے ناکارہ بنایا جبکہ 9 اسرائیل میں گرے ، صہیونی فوج کا کہنا ہے کہ یہ راکٹ حملے لبنان سے فلسطینی مزاحمتی تحریک حماس نے کئے تھے جس کے بعد سے اسرائیلی فضائیہ نے مقبوضہ فلسطین کے محصور شہر غزہ کے مختلف علاقوں پر بمباری شروع کردی ۔
اسرائیلی فوج کی جانب سے بمباری تیسرے روز بھی جاری رہی۔قبل ازیں ایک فلسطینی سکیورٹی ذریعے نے بتایا کہ اسرائیلی طیاروں نے غزہ کی پٹی کے الگ الگ علاقوں میں عزالدین القسام بریگیڈز سے تعلق رکھنے والے کئی تربیتی مقامات پر حملے شروع کیے ہیں۔
صہیونی فوج نے اپنی فضائیہ کے حملوں کی تصدیق کر تے ہوئے اپنے بیان میں کہا کہ اس کے لڑاکا طیاروں نے کچھ دیر قبل شمالی غزہ کی پٹی کے علاقے بیت حانون کے علاقے میں ایک اور خان یونس کے علاقے میں ایک دہشت گرد سرنگ کو نشانہ بنایا ہے۔ شمالی اور وسطی غزہ کی پٹی میں حماس کے ہتھیاروں کی تیاری کے دو مقامات کو بھی نشانہ بنایا گیا۔ اسرائیلی فوج کے بیان میں غزہ کی پٹی سے ہونے والی تمام "دہشت گردانہ سرگرمیوں” کا ذمہ دار حماس کو ٹھہرایا گیا۔