شہدا کے خون کے ایک ایک قطرے کا حساب لیں گے

(روز نامہ قدس ۔آنلائن خبر رساں ادارہ ) صیہونی ریاستی دہشتگردی میں بچوں اور بزرگوں سمیت  درجن سے زائد فلسطینیوں کی شہادت قابل افسوس ہےجس کا حساب لیا جائے گا۔

اسلامی تحریک مزاحمت (حماس) فلسطین کے مغربی کنارے کے شمالی شہر نابلس میں صیہونی  فوج کی دہشتگردی میں فلسطینیوں کی  شہادت کی شدید الفاظ میں مذمت کرتے ہوئے شہداء کے لواحقین کے ساتھ مکمل یکجہتی کا اظہار کیا ہے۔ حماس نے پوری قوم اور مسلم امہ کی طرف سے شہداء کے اہل خانہ سے تعزیت کی۔

حماس کی طرف سے پریس کو جاری ایک بیان میں کہا گیا ہے کہ قابض صہیونی فوج کی طرف سے نہتے فلسطینیوں کے قتل عام سے فلسطینی قوم کی تحریک آزادی اور ان کے جذبہ مزاحمت کو نہیں دبایا جا سکتا۔

بیان میں کہا گیا ہے کہ اسرائیلی فوج نے بربریت کا مظاہرہ کرتے ہوئے ایک درجن کے قریب بے گناہ فلسطینیوں کو شہید کیا ہے جن میں کم عمر بچے اور بزرگ شہری بھی شامل ہیں۔ حماس شہداء کے خاندانوں کے ساتھ کھڑی ہے اور ہم دشمن سے نہتے شہدا کے خون کے ایک ایک قطرے کا حساب لیں گے۔

بیان میں کہا گیا ہے کہ دو فلسطینی نوجوانوں اسلیم اور عمر ابو بکر کو اس وقت شہید کیا گیا جب وہ اپنے گھر کے اندر تھے اور ان کے مکان کو ان کے اندر ہونے کےباوجود مسمار کردیا گیا جس کے نتیجے میں دونوں نوجوان شہید ہوئے۔