(روز نامہ قدس ۔آنلائن خبر رساں ادارہ ) سات ملکی ٹورنا منٹ میں بھارتی ٹیم کی عدم شرکت کے باعث اب یہ مقابلہ چھ ممالک کے درمیان کھیلا جائے گا۔
پاکستان بیس بال فیڈریشن کے زیر اہتمام ویسٹ ایشیا بیس بال کپ 27 جنوری سے اسپورٹس کمپلیکس اسلام آباد میں شروع ہوگا، جس میں بھارت، بنگلہ دیش، افغانستان، فلسطین، نیپال اور سری لنکا سمیت 7 ممالک کی ٹیمیں شرکت کررہی ہیں۔
نائب صدر ایشین بیس بال فیڈریشن سید فخر شاہ کا کہنا ہے کہ بنگلہ دیش اور نیپال کی ٹیمیں ایونٹ میں شرکت کیلئے گذشتہ روز پاکستان پہنچ گئیں ہیں جبکہ جبکہ افغانستان اور سری لنکا کی ٹیمیں آج 26 جنوری کو اسلام آباد پہنچیں گی۔
ٹورنامنٹ میں اصل میں سات ٹیمیں شامل تھیں لیکن بھارتی اسکواڈ کو بھارتی وزیراعظم نریندر مودی کی حکومت نے پاکستان میں کھیلنے اجازت دینے سے انکار کردیا اور بھارتی کلیرنس نہ ملنے کی وجہ سے بھارتی کھلاڑی پاکستان نہ پہنچ سکے حالانکہ حکومت پاکستان نے بھارتی بیس بال اسکواڈ کو ویزے کئی ہفتے پہلے جاری کردئیے تھے۔
بھارتی ٹیم کی عدم شرکت کی وجہ سے ٹورنامنٹ سات ملکی سے اب چھ ملکی ٹورنامنٹ بن گیا۔ اسپورٹس منتظمین نے بھارتی حکومت کے فیصلے پر مایوسی کا اظہار کیا ہے جبکہ فلسطینی بیس بال ٹیم کے پاکستان کے سفر کیلئے اسرائیلی حکومت کی سہولت کاری کو خوش آئند قرار دیا ہے۔
انٹرنیشنل ٹورنامنٹ روبن لیگ سسٹم کے تحت کھیلا جائے گا جبکہ ٹیم منیجرز کی میٹنگ اور پری ٹورنامنٹ پریس کانفرنس آج وپاکستان سپورٹس کمپلیکس میں ہوگی۔
ٹورنامنٹ کے تمام تر انتظامات مکمل کرلیے گئے ہیں۔ ایونٹ کے کامیاب انعقاد کیلئے پاکستان اسپورٹس بورڈ اور اسپورٹس بورڈ پنجاب نے بھرپور تعاون کیا۔