(روز نامہ قدس ۔آنلائن خبر رساں ادارہ ) تینوں فلسطینیوں کو صہیوی فوج نے گولیاں مار کرشہید کیا ، دہشتگرد فوج کا دعویٰ ہے کہ تینوں نوجوان اسرائیل مخالف سرگرمیاں انجام دینے کی کوشش کررہے تھے۔
فلسطینی ذرائع کے مطابق غیر قانونی صہیونی فورسز نے آج صبح مقبوضہ بیت المقدس کے شہر رام اللہ کے شمال مغربی قصبے کفر عین میں دو فلسطینی سگے بھائی 22 سالہ جواد عبدالرحمٰن رماوی اور 21 سالہ ظافر کو فائرنگ کرکے شہید کردیا ، دوسری جانب مقبوضہ مغربی کنارے کے شہر الخلیل کے قصبے بیت العمر میں صہیونی فورسز نے 44 سالہ مفید محمد الخلیل کو بھی گولیاں مار کر شہید کردیا ۔
صہیونی فوج کی جانب سے جاری کردہ مختصر بیان میں بس اتنا بتایا گیا ہے کہ شہید کئے گئے تینوں فلسطینی اسرائیلی سلامتی کے خلاف کام کررہے تھے اور جس دوران ان کو حراست میں لینے کی کوشش کی گئی انھوں نے اسرائیلی فوج پر فائرنگ کی جس پر جوابی کارروائی میں تینوں کو شہید کردیا گیا ۔