صہیونی فوج کا فلسطینیوں کے اسٹیڈیم پر دھاوا، نوجوان گرفتار

(روز نامہ قدس ۔آنلائن خبر رساں ادارہ ) صہیونی فورسزنے اسٹیڈیم پر اس وقت دھاوا بولا جب اسکولوں کے درمیان  میچ جاری تھا ، غاصب فورسز نے آنسو گیس کے گولے برسائے اور توڑپھوڑ کی۔

فلسطین کے مقبوضہ مغربی کنارےکے جنوبی شہر بیت لحم میں قائم الخضراسٹیڈیم کے منیجنگ ڈائریکٹر یوسف سیل نے ایک پریس بیان میں کہا کہ قابض فورسز نے گذشتہ روز اسٹیڈیم پر اچانک حملہ کیا، آنسو گیس کی شیلنگ کی اور توڑ پھوڑ کرنے کے ساتھ ساتھ ایک نوجوان کو بھی گرفتارکرلیا۔

انھوں نے بتایا کہ جس وقت صہیونی فورسز نے اسٹیڈیم پر دھاوا بولا اس وقت اسکولوں کے درمیان میچ کھیلا جارہا تھا جس کو بند کرنا پڑا، غاصب فورسز نے وہاں سے ایک نوجوان کو حراست میں لے کر نامعلوم مقام پر منتقل کردیا ہے۔ انھوں نے مزید بتایا کہ صہیونی فورسزکا یہ  حملہ اپنی نوعیت کا پہلا نہیں ہے بلکہ اس سے قبل بھی مختلف ٹیموں کے میچز اور ٹریننگ کے دوران ایسا ہوتا رہا ہے۔