(روز نامہ قدس ۔آنلائن خبر رساں ادارہ ) مزاحمت کاروں نے 24 گھنٹوں کے دوران سات مختلف مقامات پر صہیونی فوجیوں پر فائرنگ کی جبکہ نگرانی کےلئے تعمیر کردہ ٹاور کو بھی تباہ کردیا۔
صہیونی ریاست کے ذرائع ابلاغ کے مطابق فلسطینی مزاحمت کاروں کے اسرائیلی فوج اور صہیونی آبادکاروں کے خلاف مزاحمتی کارروائیاں تیزی کے ساتھ جاری ہیں ، فلسطینی مجاہدین نے گذشتہ 24 گھنٹوں کے دوران مقبوضہ مغربی کنارے کے مختلف مقامات پر فائرنگ کی سات مختلف کارروائیاں کی تاہم اس میں کسی کے زخمی ہونے کی اطلاع نہیں ملی۔
بیت المقدس میں حزما، رام اللہ میں المغیر اور البیرہ اور جنین میں قبطیہ میں جھڑپیں ہوئیں اور مزاحمتی کارکنوں نے شاکید بستی کے قریب قابض فوج پر فائرنگ کی۔
بیت لحم کے تقوع ، الخلیل میں حلحول اور بیت امر میں بھی جھڑپیں ہوئیں، مزاحمتی کارکنوں نے بیت امر میں قابض فوج پر فائرنگ کی اور العروب کیمپ میں ایک فوجی کمرے کو تباہ کردیا۔
مغربی کنارے میں بیت امرقصبے کے قریب قابض افواج پر فائرنگ، العروب پناہ گزین کیمپ کے قریب ٹاور کی تباہی اور جنین میں شاکیڈ بستی میں فائرنگ کے واقعات پیش آئے۔