اردن کا غاصب ریاست کے ساتھ ’مشترکہ انڈسٹریل پارک‘ بنانے کا فیصلہ

(روز نامہ قدس ۔آنلائن خبر رساں ادارہ ) اردن نے غاصب صیہونی ریاست کے ساتھ  تعلقات کو نئے دور میں داخل کرنے لےلئے  اسرائیل کے ساتھ ایک مشترکہ صنعتی پارک بنانے کا فیصلہ کیا ہے جہاں دونوں ممالک کے افراد  بلاروک ٹوک آمدروفت کرسکیں گے۔

غیر ملکی خبررساں ادارے کی جانب سے جاری کردہ رپورٹ میں انکشاف کیا گیا ہے کہ  غاصب صیہونی ریاست اسرائیل کے وزیراعظم یائر لپید اور اردن کے  بادشاہ شاہ عبداللہ دوم کے درمیان گزشتہ ہفتے  دارالحکومت عمان میں ایک ملاقات ہوئی تھی جس میں غاصب صیہونی ریاست  اسرائیل اور اردن نے 28 سالہ تعلقات کو اگلے مرحلے میں لے جانے کے لیے 1994 میں امن معاہدے کے وقت پیش کی گئی مشترکہ انڈسٹریل پارک کی تجویز کو عملی جامہ پہنانے پر اتفاق کیا۔

یہ بھی پڑھیے

اردن کے بادشاہ کی اسرائیلی یک طرفہ اقدامات پر اظہار تشویش

سر حد پر بنائے جانے والے انڈسٹریل پارک ’’ اردن گیٹ وے پارک‘‘ کے ٹرمینل کی تعمیراسرائیل ایئرپورٹس اتھارٹی کے سپرد ہے۔ یہ گیٹ وے انڈسٹریل پارک میں دلچسپی رکھنے والے اسرائیل اور اردن کے تاجروں کے لیے کراسنگ ایریا ہوگا جہاں سے وہ سے پیدل چل کر بھی  بلا روک ٹوک انڈسٹریل پارک میں آجا سکیں گے۔

انڈسٹریل پارک میں دونوں ممالک کی کمپنیاں ہوں گی اور روزگار کے نئے مواقع سامنے آئیں گے جب کہ کاروباری مقاصد کے لیے آنے والے ایگزیکٹوز اور مہمانوں کی میزبانی کی سہولت بھی شامل ہوگی۔

اس حوالے سے اسرائیلی وزیراعظم یائرلپید نے میڈیا کو بتایا کہ سرحد پر ’’اردن گیٹ وے پارک کی تعمیر‘‘  کا فیصلہ دونوں ممالک کے درمیان تعاون کو مضبوط کرنے کے لیے کیا گیا ہے جس سے روزگار میں اضافہ ہوگا اور تجارتی و سفارتی تعلقات مستحکم ہوں گے۔