(روزنامہ قدس ۔آن لائن خبر رساں ادارہ) مریم اورنگزیب نے قابض صہیونی ریاست کے دورے پر جانے والے صحافی حضرات کے اس غیر ذمہ دارانہ اقدام سے متعلق کہا کہ سستی سیاسی شہرت کیلئےہر منفی اقدام کرنیوالے قومی مفاد کا تو خیا ل کریں۔
ذرائع سے موصولہ اطلاعات کےمطابق وفاقی وزیراطلاعات مریم اورنگزیب کی جانب سے جاری بیان کے مطابق گذشتہ ہفتے قابض صہیونی ریاست اسرائیل کا دورہ کر نے والے پاکستانی نژاد امریکی وفد میں شامل حکومتی چینل پی ٹی وی کے اینکر پرسن احمد قریشی کو نوکری سے فارغ کردیا گیا ہے۔
وفاقی وزیراطلاعات نے اسرائیل سے تعلقات سے متعلق سرکاری اہم پالیسی بیان کرتے ہوئے کہا ہے کہ فلسطین کی حمایت میں پالیسی میں کوئی تبدیلی آئی ہے نہ آئے گی، فلسطین پر ریاستی پالیسی واضح ہے، عوام کی خواہشات اور امنگوں کے منافی کوئی پالیسی نہیں ہوگی جبکہ وزارت خارجہ پہلے ہی اس بات کی وضاحت کرچکی ہے کہ پاکستان سے کوئی وفداسرائیل نہیں گیا، دورے میں شامل پی ٹی وی اینکر کو ٹرمینیٹ اورآف ائیر کردیاگیا ہے جو اپنی ذاتی حیثیت سے صہیونی ریاست کے دورے پر گئے۔
مریم اورنگزیب نے کہا کہ مسئلہ فلسطین اوراسرائیل کے معاملے پر اصولی مؤقف پرآج بھی کاربند ہیں اور فلسطینیوں کےاستصواب رائے کے حق کی مکمل حمایت کرتے ہیں جبکہ مقبوضہ فلسطین اور مسئلہ کشمیر کا حل عالمی برادری کی ذمہ داری ہےاور جب تک یہ دونوں مسائل کے منصفانہ حل نہیں کیے جاتے تب تک پائیدار امن خواب ہی رہے گا۔
مریم اورنگزیب نے قابض صہیونی ریاست کے دورے پر جانے والے صحافی حضرات کے اس غیر ذمہ دارانہ اقدام سے متعلق کہا کہ سستی سیاسی شہرت کیلئےہر منفی اقدام کرنیوالے قومی مفاد کا تو خیا ل کریں۔
واضح رہے کہ پاکستانی اینکر پرسن کی پی ٹی وی سے برطرفی ایک دن بعد سامنے آئی جب اسرائیلی صدراسحاق ہرزوگ نے پاکستانی تارکین وطن کے ایک15 رکنی وفد سے ملاقات کی تصدیق کردی، اینکر پرسن اس ماہ کے شروع میں اسرائیل کے دورے پر جانے والے اس پاکستانی نژاد امریکی وفد کا حصہ تھےجس کا اہتمام امریکن مسلم اینڈ ملٹی فیتھ ویمن کونسل اور شاراکا نامی ایک این جی او نے کیا تھا۔