(روزنامہ قدس ۔آن لائن خبر رساں ادارہ) دہشتگرد صہیونی گروہ کے سربراہ نے اشتعال انگیز اعلان کرتے ہوئے کہا ہے کہ قبۃ الصخرہ کو منہدم کرنے کی کارروائی 29 مئی کو شروع کی جائے گی ۔
صہیونی ذرائع ابلاغ کے مطابق صہیونی "دہشت گرد” تنظیم "لاھافا” کے سربراہ بنٹزی گوپسٹین نے اپنے سوشل میڈیا اکاؤنٹ پر ایک اشتعال انگیز اعلان کیا ہے جس کے تحت انتہا پسند غیر قانونی صہیونی آبادکاروں کو ترغیب دیتے ہوئے کہا ہے کہ 29 مئی کو مقبوضہ بیت المقدس میں قبلہ اول کے احاطے میں موجود قبۃ الصخرہ کو منہدم کرنے کی کارروائی شروع کی جائے گی ۔
بنٹزی گوپسٹین نے انتہاپسندصہیونی آبادکاروں کو کہا ہے کہ وہ ملک بھر سے اس مقام پر پہنچیں اور قبۃ الصخرہ کے انہدام میں اپنا کردار ادا کریں، انتہاپسند تنظیم کے سربراہ نے اپنی پوسٹ کے ساتھ چند تصاویریں بھی شیئر کی ہیں جس میں ڈوم آف راک کے اطراف میں کھدائی کرتے ہوئے دیکھا جاسکتا ہے ۔
واضح رہے کہ ڈوم آف راک (قبۃ الصخرہ) مسجد اقصیٰ کے احاطے میں موجود ایک مسجد ہے جس کو حضرت عمر رضی اللہ تعالیٰ نے تعمیر کیا تھا اور یہ مقدس ترین مقامات میں شامل ہے، انتہا پسند تنظیم کے سربراہ نے 29 مئی کا دن اس اشتعال انگیزکارروائی کے لئے اس لئے منتخب کیا ہے اس کا کہنا ہے کہ 1967 کو 29 مئی کے روز اسرائیل نے بیت المقدس پر اپنا قبضہ مکمل کیا تھا اس دن کی مناسبت سے قبۃ الصخرہ کے انہدام کو منتخب کیا گیا ہے۔