(روزنامہ قدس ـ آنلائن خبر رساں ادارہ) عزالدین القسام بریگیڈز نے اعلان کیا ہے کہ فلسطینی مزاحمت نے جنگ بندی معاہدے کے مطابق تمام زندہ صہیونی قیدی اور ان کی لاشیں حوالے کر دی ہیں تاہم باقی لاشوں کو ملبے تلے سے نکالنے کے لیے خصوصی مشینری اور وسائل کی ضرورت ہے۔
القسام نے واضح کیا کہ مزاحمت نے معاہدے کی تمام شقوں پر عمل کیا ہے اور اس معاملے کو مکمل طور پر ختم کرنے کے لیے کوششیں جاری ہیں۔
قابض عبرانی روزنامے ٹائمز آف اسرائیل نے دعویٰ کیا ہے کہ حماس مزید چار صہیونی قیدیوں کی لاشیں بدھ کے روز غاصب اسرائیل کے حوالے کرنے کا ارادہ رکھتی ہے۔ اس کے بعد اب تک مجموعی طور پر بارہ لاشیں تل ابیب کو منتقل کی جا چکی ہیں جبکہ معاہدے کے تحت یہ تعداد اٹھائیس تک پہنچنا ضروری ہے۔
غزہ میں دو سال سے جاری تباہی کے بعد ملبے تلے موجود لاشوں کی بازیابی ایک پیچیدہ مسئلہ بن چکا ہے، اور بعض مبصرین کا کہنا ہے کہ ناجائز قاتل صہیونی حکومت اسی نکتے کو جواز بنا کر انسانی امداد کی ترسیل میں رکاوٹیں پیدا کر رہی ہے۔
