فلسطین نیوز کو موصول ہونے والی اطلاعات کے مطابق اسرائیلی عدالت نے صیہونی فوجی کو صرف تھپڑ مارنے کے جرم میں فلسطینی لڑکی عہد التمیمی کو 8 ماہ قید کی سزا سنا دی ہے۔
17 سالہ عہد التمیمی نے عدالت میں صیہونی فوجی کو تھپڑ مارنے کا اعتراف کیا۔ اسرائیلی پولیس نے ان پر 12 الزامات عائد کیے جن میں سے انہوں نے چار الزامات قبول کرلیے۔
عدالت نے عہد التمیمی پر 1440 ڈالر جرمانہ بھی عائد کردیا۔ عہد التمیمی کی وکیل گیبسی لیسکی نے بتایا کہ وہ آئندہ موسم گرما تک رہا ہوجائیں گی۔
تاہم وکیل لاسکی کا کہنا تھا کہ وہ اسی صورت میں یہ پلی بارگین کا سمجھوتا پیش کریں گی، جب اسرائیلی عدالت پہلے تمیمی کی والدہ نریمان تمیمی سے متعلق بھی ایسا کوئی سمجھوتا قبول کرے گی۔ نریمان کو بھی عدالت آٹھ ماہ قید کی سزا سنائے گی اور وہ جو عرصہ جیل میں اب تک گزار چکی ہیں،اس کو بھی سزا کی مدت شمار کیا جائے گا۔اسرائیلی عدالت آج بدھ کو اس معاملے میں کوئی فیصلہ کرنے والی تھی۔
واضح رہے کہ عہد تمیمی اور ان کی 20 سالہ کزن نور تمیمی کو 15 دسمبر کو مغربی کنارے میں واقع گاؤں نبی صالح میں دو اسرائیلی فوجیوں کو تھپڑ اور ٹھڈے مارنے کے الزام میں 19 دسمبر کو گرفتار کیا گیا تھا ۔ان کے مکان کے احاطے میں دو اسرائیلی فوجی آ گھسے تھے اور ان دونوں نے انھیں مکان سے نکالنے کی کوشش کی تھی۔
اس واقعے کی ویڈیو انٹر نیٹ پر وائرل ہوگئی تھی جس پر انھیں اسرائیلی فوج کی شان میں گستاخی کے الزام میں گرفتار کرکے مغربی کنارے میں واقع گاؤں بیتونیہ میں قائم اسرائیل کے زیر انتظام عفر جیل میں بند کردیا گیا تھا۔