مقبوضہ بیت المقدس (فلسطین نیوز۔مرکز اطلاعات) اسرائیلی فوج نے مسجد اقصیٰ کے ایک سینیر محافظ کو پندرہ دن کے لیے قبلہ اوّل میں داخل ہونے پر پابندی عائد کردی۔
فلسطین نیوز کو موصول ہونے والی اطلاعات کے مطابق اسرائیلی فوج نے مسجد اقصیٰ کے احاطے سے ایک مسجد کے ایک محافظ ایھاب ابو غزالہ کو حراست میں لیا اور انہیں پرانے شہر میں قائم ایک حراستی مرکز منتقل کردیا گیا۔اسرائیلی پولیس نے ابو غزالہ پر صیہونی آباد کاروں کو مسجد اقصیٰ سے دور کرنے اور پولیس احکامات ماننے سے انکار کا الزام عائد کیا جس کے بعد انہیں پندرہ دن کے لیے قبلہ اوّل سے بے دخل کردیا گیا۔
ادھر جمعرات کو اسرائیلی فوج اور پولیس کی فول پروف سیکیورٹی میں 46 صیہونی آباد کاروں نے مسجد اقصیٰ کی بے حرمتی کی۔ صیہونی آباد کار ساڑھے تین گھنٹے قبلہ اوّل میں گھومتے اور اشتعال انگیز حرکات کرتے رہے۔ اس موقع پر اسرائیلی فوج اور پولیس کی بھاری نفری نے صیہونی شرپسندوں کو قبلہ اوّل پر دھاووں کے لیے فول پروف سیکیورٹی مہیا کر رکھی تھی۔