بیت لحم ( فلسطین نیوز۔مرکز اطلاعات) فلسطین کے مقبوضہ مغربی کنارے کے جنوبی شہر بیت لحم میں چھٹی عالمی میراتھن ریس کا اہتمام کیا گیا۔
فلسطین نیوز کو موصول ہونے والی اطلاعات کے مطابق ’آزادی کے لیے قدم بڑھاؤ‘ کے عنوان سے یہ میراتھن مقابلہ بیت لحم میں المھد چرچ کے باہر سے ہوا۔ مقابلے میں 7000 مقامی ، علاقائی اور عالمی رنر نے شرکت کی۔ ریس میں مجموعی طورپر 72 ممالک کے شرکاء شامل تھے۔ مقابلے کےلیے چار الگ الگ گروپ بنائے گئے تھے۔ پہلے گروپ میں 42 کلو میٹر کی دوڑ کا مقابلہ تھا۔ دوسرے میں 21 کلو میٹر، تیسرے میں 10 اور چوتھے میں 5 کلو میٹر کا مقابلہ تھا۔ چوتھے گروپ میں شرکاء نے خاندانوں کی شکل میں مقابلے میں حصہ لیا۔میراتھن لائن کے لیے وضع کردہ روٹ میں المھد چرچ سے مختلف سڑکوں کو مختص کیا گیا تھا۔ شاہراہ المہد چرچ، مسجد بلال بن رباح، عائد، العز اور الدھیشہ پناہ گزین کیمپوں، الخضراور دیگر 11 اسٹیشن مقرر کیے گئے تھے۔