استنبول (فلسطین نیوز۔مرکز اطلاعات) اسرائیلی فوج کے ہاتھوں غزہ کی پٹی میں صحافی یاسر مرتضیٰ کے وحشیانہ قتل کے خلاف ترکی کے مختلف شہروں میں احتجاجی مظاہرے کیے گئے۔
فلسطین نیوز کو موصول ہونے والی اطلاعات کے مطابق استنبول میںÂ ہونے والے ایک احتجاجی مظاہرے میں بڑی تعداد میں عام شہریوں اور صحافیوں نے بھی شرکت کی۔ مظاہرے سے خطاب کرتے ہوئے مقررین نے نہتے اور پُرامن فلسطینی مظاہرین پر صیہونی فوج کے وحشیانہ تشدد کی شدید مذمت کی اور شہید فلسطینی صحافی یاسر مرتضیٰ کے ساتھ مکمل یکجہتی کا اظہار کیا۔استنبول میں تقسیم کے مقام پر ہونے والے مظاہرے میں شرکاء نے شہید صحافی یاسر مرتضیٰ کی تصاویر اور اسرائیلی بربریت کے خلاف پوسٹر اٹھا رکھے تھے جن پر صیہونی فوج کی مظاہرین پر حملوں کی شدید مذمت کی گئی تھی۔ مظاہرین نے اسرائیلی فوج کے ہاتھوں فلسطینی مظاہرین کے قتل عام کے خلاف شدید نعرے بازی بھی کی۔
خیال رہے کہ گذشتہ جمعہ کو اسرائیلی فوج نے مشرقی غزہ کی سرحد پر جمع ہونے والے ہزاروں فلسطینیوں پر براہ راست فائرنگ کردی تھی جس کے نتیجے میں کم سے کم دس شہری شہید اور سیکڑوں زخمی ہوگئے تھے۔ شہداء میں یاسر مرتضیٰ بھی شامل تھے جنہیں پریس جیکٹ پہننے کے باوجود اسرائیلی فوجیوں نے قریب سے گولیاں مار کر شہید کردیا تھا۔
مقررین نے یاسر مرتضیٰ اور دیگر شہید فلسطینیوں کی فوری اور شفاف تحقیقات کا مطالبہ کیا۔