باکو (فلسطین نیوز۔مرکز اطلاعات) جمہوریہ آذربائیجان میں ناوابستہ تحریک (NAM) کے وزرائے خارجہ کے 18ویں اجلاس کا اختتام ہوگیا جس میں تنظیم کے 120 رکن ممالک نے فلسطینی قوم کے خلاف صیہونی مظالم اور جارحیت کی شدید الفاظ میں مذمت کی ۔
فلسطین نیوز کو موصول ہونے والی اطلاعات کے مطابق اختتامی بیان میں فلسطینی عوام کے خلاف ناجائز صیہونی قبضے، غیرقانونی پالیسی، مقبوضہ فلسطین میں صیہونیوں کی جانب سے غیرقانونی آباد کاریوں اور نہتے فلسطینیوں کی گرفتاری اور ان پر شدید مظالم کی شدید مذمت کی گئی ہے۔ناوابستہ تحریک کے رکن ممالک نے غزہ میں حالیہ تشدد کے واقعات بالخصوص صیہونی فورسز کے ہاتھوں فلسطینی شہریوں کی شہادت اور انسانی حقوق کی خلاف ورزیوں پر افسوس کا اظہار کرتے ہوئے غاصب صیہونی حکومت سے مقبوضہ فلسطین میں انسانی حقوق کی خلاف ورزی کو فوری بند کرنے کا مطالبہ کیا۔
واضح رہے کہ ہزاروں فلسطینیوں نے غزہ اور غرب اردن میں کل دوسرے جمعے کو بھی واپسی کے حق میں بڑے پیمانے پرمظاہرے کیے۔ اسرائیلی فوجیوں نے فلسطینی مظاہرین پر آنسوگیس کے گولے داغے اور فائرنگ کی جس میں 17 فلسطینی شہید اور1400 زخمی ہوگئے۔
واضح رہے اس اجلاس میں ناوابستہ تحریک کے 120 ممالک کے 800 نمائندے، 17 مبصر ممالک اور 10 عالمی اداروں کے وفود بھی شریک تھے۔