ماسکو (فلسطین نیوز۔مرکز اطلاعات) روسی وزارت خارجہ نے فلسطین کے علاقے غزہ کی پٹی پر اسرائیلی فوج کی جانب سے طاقت کے استعمال کی شدید مذمت کرتے ہوئے صہیونی فوج کی کارروائیوں کو مسترد کردیا ہے۔
فلسطین نیوز کو موصول ہونے والی اطلاعات کے مطابق روسی وزارت خارجہ کی طرف سے جاری کردہ ایک بیان میں کہا گیا ہے کہ صیہونی فوج کا غزہ میں پُرامن شہریوں کے جلوسوں پر طاقت کا وحشیانہ استعمال قطعا ناقابل قبول ہے۔روسی وزارت خارجہ نے مزید کہا کہ اسرائیل خطرناک کشیدگی پھیلانے والے اقدامات سے باز رہے ۔
بیان میں مزید کہا گیا ہے کہ ماسکو غزہ میں حالیہ ایام میں پُرامن فلسطینی مظاہرین پر اسرائیلی حملوں کی تحقیقات میں مدد کے لیے تیار ہے۔ حال ہی میں اقوام متحدہ کے سیکرٹری جنرل انتونیو گوٹیرس نے بھی غزہ میں پُرامن مظاہرین کی شہادتوں کی آزادانہ تحقیقات کا مطالبہ کیا تھا۔
واضح رہے کہ غزہ میں گذشتہ دو ہفتوں کے دوران قدس کی غاصب اور جابر صیہونی حکومت کی مظلوم اور نہتے فنسطینیوں پر فائرنگ سے 31 سے زائد فلسطینی شہید اور 3000 سے زائد زخمی ہوچکے ہیں۔