مقبوضہ بیت المقدس (فلسطین نیوز۔مرکز اطلاعات) تیونس کی ایک عدالت نے چار اسرائیلی کھلاڑیوں کو ملک میں ہونے والے تائیکوانڈو بین الاقوامی چیمپئین شپ میں شرکت سے روک دیا ہے۔
فلسطین نیوز کو موصول ہونے والی اطلاعات کے مطابق تیونس میں انسانی حقوق کے کارکنان کی طرف سے عدالت میں درخواست دی گئی تھی جس میں کہا گیا تھا کہ اسرائیلی ریاست کے کھلاڑیوں کو تیونس میں ہونے والے مقابلے میں شرکت سے روکنے کے احکامات جاری کیے جائیں۔خیال رہے کہ تیونس میں عالمی تائیکواندو چیمپیئین شپ چھ سے 16 اپریل تک ساحلی شہر حمامات میں منعقد کیے جا رہے ہیں۔
ایک عدالتی ذریعے کا کہنا ہے کہ گذشتہ ہفتے عدالت نے اسرائیلی کھلاڑیوں کو مقابلے میں شرکت کی اجازت دی تھی مگر اسرائیل سے تعلقات مخالف عرب قومی مزاحمتی کمیٹی نے دعالت میں اس فیصلے کے خلاف درخواست دائر کی تھی۔ یہ درخواست تیونس کے تائیکوانڈو فیڈریشن کے چیئرمین احمد جعلول کے خلاف دائر کی گئی ہے جس میں انہیں اسرائیل سے راہ و رسم بڑھانے کا ذمہ دار قرار دیا ہے۔
درخواست گذاروں نے بتایا کہ عدالت نے واضح فیصلہ دیا ہے کہ جعلول اسرائیلی کھلاڑیوں کو شرکت کی دعوت یا ان کی میزبانی کا اختیار نہیں رکھتے۔