مقبوضہ بیت المقدس ( فلسطین نیوز۔مرکز اطلاعات) صیہونی حکومت کے وزیراعظم نتین یاہو اور ان کی بیوی سے مالی بدعنوانی کے معاملے میں ایک بار پھر بازپرس کی گئی ہے۔
فلسطین نیوز کو موصول ہونے والی اطلاعات کے مطابق صیہونی حکومت کے وزیراعظم نتین یاہو، ان کی بیوی اور ایک بیٹے سے تل ابیب کے پولیس اسٹیشن میں مالی بدعنوانی کے معاملے میں بازپرس کی گئی ہے۔نتین یاہو، ان کی بیو اور بیٹے سے پولیس نے الگ الگ بازپرس کی جبکہ اسرائیلی میڈیا کا کہنا ہے کہ بازپرس کرنے والے پولیس افسران کا بازپرس کے دوران آپس میں رابطہ تھا تاکہ وہ تینوں افراد کی باتوں میں پائے جانے والے تضاد سے کوئی نتیجہ نکال سکیں- نتین یاہو سے نویں بار مالی بدعنوانی کے تین معاملات میں بازپرس کی گئی۔
نتین یاہو پر ایک معاملے میں الزام ہے کہ انہوں نے بزک کمپنی کے مالک شاؤل الویچ کو کروڑوں ڈالر کی رقم تک رسائی میں سہولتیں فراہم کی تھیں تاکہ اس کمپنی کی نگرانی میں کام کرنے والا اخبار اور اس کی ویب سائٹ اسرائیلی وزیراعظم اور ان کے گھر والوں کی حمایت میں خبریں دے- واضح رہے کہ نتین یاہو پر تاجروں سے رشوت لینے کا بھی الزام ہے۔