مقبوضہ بیت المقدس ( فلسطین نیوز۔مرکز اطلاعات) اسرائیل کے آرمی چیف جنرل گیڈی آئزنکوٹ نے خبردار کیا ہے کہ غزہ کی پٹی کی بحرانی صورت حال ایک نئی جنگ کی طرف بڑھ رہی ہے۔
فلسطین نیوز کو موصول ہونے والی اطلاعات کے مطابق اپنے ایک بیان میں اسرائیلی آرمی چیف نے کہا کہ غزہ کے عوام میں غم و غصہ کہ لہر میں مسلسل شدت آ رہی ہے۔ دوسری جانب فلسطینیوں کی جانب سے ’یوم الارض‘ پر واپسی ملین مارچ کے اعلان کے بعد فلسطینیوں کی احتجاجی سرگرمیاں تیز ہوگئی ہیں۔عبرانی اخبار ’یدیعوت احرونوت‘ میں شائع ایک بیان میں جنرل آئزنکوٹ کا کہنا ہے کہ غزہ کی سرحد پر کشیدگی کے امکانات کے تناظر میں فوج کو تمام سیناریو سے نمٹنے کے لیے تیار رکھا گیا ہے۔
انہوں نے کہا کہ غزہ کی سرحد پر اسرائیلی فوج کو فلسطینیوں کی طرف سے سخت چیلنج کا سامنا کرنا پڑ سکتا ہے۔ فوج کو پوری قوت اور عزم کے ساتھ ان سے نمٹنا ہوگا۔
خیال رہے کہ فلسطینی عوام نے 30 مارچ کو 42 ویں یوم الارض کے موقع پر ’واپسی ملین مارچ‘ کا اعلان کیا ہے۔ اس موقع پر آئندہ جمعہ کو فلسطین بھر میں احتجاجی مظاہرے، جلسے جلوس اور ریلیاں نکالی جائیں گی۔ غزہ اور دوسرے فلسطینی علاقوں میں موجود فلسطینی سنہ1948ء کے مقبوضہ فلسطینی علاقوں کی طرف مارچ کریں گے۔
حال ہی میں غزہ کی پٹی میں اسلامی تحریک مزاحمت ’حماس‘ کے عسکری ونگ عزالدین القسام بریگیڈ کے 30 ہزار کارکنان نے مشقیں کیں۔ ان مشقوں کے دوران فائرنگ کے واقعات کو اسرائیل نے راکٹ حملے سمجھ کر غزہ پر بمباری بھی کی۔