مقبوضہ بیت المقدس (فلسطین نیوز۔مرکز اطلاعات) اسرائیلی ذرائع ابلاغ کے مطابق اسرائیلی فوج نے آنے والے دنوں میں فلسطینیوں کی طرف سے متوقع حملوں کے خطرے کے پیش نظر فوجیوں کی تمام تعطیلات منسوخ کردی ہیں۔ حتیٰ کہ اگلے چند ہفتوں کے دوران اسرائیلی فوجی مذہبی تہواروں کے موقع پر بھی چھٹی نہیں جا سکیں گے۔
فلسطین نیوز کو موصول ہونے والی اطلاعات کے مطابق اخبار’معاریو‘ نے فوج کے ایک ذمہ دار ذریعے کے حوالے سے بتایا ہے کہ غرب اردن اور بیت المقدس میں فلسطینیوں کی طرف سے چاقو سے ہونے والے واقعات میں اضافے کے بعد فوجیوں کی چھٹیاں منسوخ کردی ہیں۔ ذرائع کا کہناہے کہ صیہونی فوجیوں کو ’عید الفصح ۔ بیسح‘ پر بھی تعطیل کی اجازت نہیں ہوگی۔عبرانی اخبار کی رپورٹ میں کہا گیاہے کہ فوج کی سینیر قیادت کی طرف سے تمام یونٹوں کو احکامات جاری کیے گئے ہیں کہ وہ تمام اہلکاروں کی چھٹیاں ہنگامی طورپر منسوخ کردیں۔ تعطیلات پر گئے فوجیوں کو بھی واپس بلانے پر غور کیا جا رہا ہے۔
عبرانی اخبار کے مطابق اسرائیلی فوج غزہ کی پٹی کی سرحد پر پیدا ہونے والی تازہ کشیدگی کے باعث فوج کو چھٹیوں سے روک رہی ہے۔ فلسطینی تنظیم اسلامی تحریک مزاحمت ’حماس‘ اور اسرائیل کے درمیان بھی کسی وقت محاذ آرائی ہوسکتی ہے۔
’معاریو‘ کے مطابق آرمی چیف جنرل گیڈی آئزن کوٹ اور دیگر سینیر عسکری لیڈر رواں ہفتے غزہ کی سرحد کا دورہ کریں گے اور وہاں پر سیکیورٹی کےحالات کا جائزہ لیں گے۔