عمان (فلسطین نیوز۔مرکز اطلاعات) اُردن کی حکومت نے مسجد اقصیٰ کی بے حرمتی کے بڑھتے واقعات اور صیہونی آباد کاروں کے قبلہ اوّل پر دھاوؤں کی شدید الفاظÂ میں مذمت کی ہے۔ اردن کا کہنا ہے کہ صیہونی ریاست عبادت کی آڑ میں مسجد اقصیٰ کا تقدس پامال کررہی ہے۔
فلسطین نیوز کو موصول ہونے والی اطلاعات کے مطابق اردنی حکومت کے ترجمان نے مقبوضہ علاقوں میں صیہونی کالونیوں کو غیرقانونی قرار دیتے ہوئے ان پر پابندی عائد کرنے کے مطالبے کا اعادہ کیا۔محمد المومنی نےایک بیان میں کہا کہ فلسطین میں صیہونی آباد کاری اور کالونیوں میں توسیع پائیدار امن کے قیام کے لیے تباہ کن اور عالمی قراردادوں کی توہین ہے۔ انہوں نے کہا کہ اسرائیل مذہبی مواقع کو جواز بنا کر قبلہ اوّل پر یلغار کی راہ ہموار کررہا ہے۔ اسرائیلی فوج اور پولیس کی سرکاری سرپرستی میں سیکڑوں صیہونی قبلہ اوّل میں داخل ہو کر مسلمانوں کے مقدس مقام کی کھلے عام بے حرمتی کرتے ہیں۔
انہوں نے صیہونی ریاست پر زور دیا کہ وہ قبلہ اوّل کے تاریخی، مذہبی اور دینی اسٹیٹس میں کسی قسم کی تبدیلی سے باز رہے ورنہ اس سے پورے خطے میں کشیدگی پیدا ہوسکتی ہے۔ ان کا کہنا تھا کہ صیہونی آباد کاروں کے قبلہ اوّل پر دھاوے نہ صرف فلسطینیوں بلکہ پوری دنیا کے مسلمانوں میں غم غصے اور اشتعال کا موجب بن رہے ہیں۔
اردنی وزیر کا کہنا ہے کہ اسرائیلی طرز عمل اور پالیسیاں یہ ظاہر کرتی ہیں کہ صیہونی ریاست تنازع فلسطین کے دو ریاستی حل کا حامی نہیں اور وہ عملا اس میں مسلسل رکاوٹیںÂ کھڑی کررہا ہے۔