غزہ ( فلسطین نیوز۔مرکز اطلاعات) اسلامی تحریک مزاحمت ’حماس‘ نے باور کرایا ہے کہ اسرائیلی ریاست بمباری اور میزائل حملوں کے ذریعے غزہ کی پٹی میں آئندہ جمعہ کو ہونے والے ’واپسی ملین مارچ‘ کو روکنا چاہتا ہے۔
فلسطین نیوز کو موصول ہونے والی اطلاعات کے مطابق آئندہ جمعہ کو غزہ کی پٹی میں ’عظیم الشان ملین مارچ‘ منعقد کیا جا رہا ہے۔ ملین مارچ کا مقصد اسرائیلی ریاست کی جانب سے جبرا بے دخل کیے گئے فلسطینی پناہ گزینوں کی واپسی کے لیے آواز بلند کرنا ہے۔رپورٹ کے مطابق حماس کے ترجمان فوزی برھوم نے ایک بیان میں کہاکہ غزہ میں فلسطینی مزاحمتی تنصیبات پر اسرائیلی طیاروں کی مسلسل بمباری کا مقصد آئندہ جمعہ کو غزہ کی پٹی میں ’واپسی ملین مارچ‘ روکنا اور غزہ کی ناکہ بندی کے خلاف ہونے والے سب سے بڑے مظاہرے کو ناکام بنانا ہے۔
بیان میں مزید کہا گیا ہے کہ غزہ کی پٹی کی موجودہ صورت حال حقیقی بحران کی عکاسی کرتی ہے۔ فلسطینی قوم نے صیہونی دشمن کی جانب سے مسلط کردہ مذموم مقاصد کو ناکام بنانا اور اپنے حقوق چھین کر لینا ہے۔ بیان میں کہا گیا ہے کہ صیہونی ریاست فلسطینی عوام کے حوصلوں اور عزائم کو شکست دینا چاہتی اور مزاحمت سے محروم کرنے کے لیے کوشاں ہے مگر صیہونی دشمن کی سازشیں کامیاب نہیں ہوں گی۔
واضح رہے کہ اسرائیلی فوج نے ہفتے اور اتوار کی درمیانی شب غزہ کی پٹی پر وحشیانہ بمباری کی جس میں متعدد مزاحمتی مراکز کو نقصان پہنچا ہے۔ اسرائیلی فوج کے جنگی طیاروں اور ڈرون طیاروں کی نچلی پروازیں بھی جاری ہیں۔