غزہ ( فلسطین نیوز۔مرکز اطلاعات) اسرائیلی فوج نے فلسطین کے علاقے غزہ کی پٹی پر سوموار کو تازہ بمباری کی ہے۔ بم باری میں فلسطینی مزاحمتی تنظیموں کے مراکز کو نشانہ بنایا گیا ہے۔
فلسطین نیوز کو موصول ہونے والی اطلاعات کے مطابق اسرائیلی فوج نے سوموار کو علی الصباح شمالی غزہ پر تو پخانے سے بمباری کی۔ قبل ازیں اسرائیلی فوج نے دعویٰ کیا کہ اسرائیل کے دفاعی شیلڈ ’آئرن ڈوم‘ نے فلسطینی مزاحمت کاروں کی طرف سے داغے گئے متعدد راکٹ تباہ کردیے۔ اس کے جواب میں اسرائیلی فوج نے غزہ کی پٹی میں فلسطینی مزاحمتی مراکز پر بمباری کی۔دوسری جانب اسلامی تحریک مزاحمت ’حماس‘ کے عسکری ونگ عزالدین القسام بریگیڈ نے ایک بیان میں کہا ہے کہ غزہ کی پٹی پر اسرائیلی فوج کی مسلسل جارحیت اور بمباری ریاستی دہشت گردی کی بدترین مثال ہے۔ بیان میں خبردار کیا گیا ہے کہ غزہ کی پٹی پر اسرائیلی جارحیت کی تمام ترذمہ داری صیہونی ریاست پر عائد ہوگی۔
خیال رہے کہ اسرائیلی فوج نے فلسطین کے علاقے غزہ کی پٹی پر مسلسل بمباری کا سلسلہ جاری رکھا ہوا ہے۔ گذشتہ روزاسرائیلی جنگی طیاروں نے چار مقامات پر فلسطینی مزاحمت مراکز پر بمباری کی تھی جس کے نتیجے میں متعدد شہری زخمی ہوگئے تھے۔