(فلسطین نیوز۔مرکز اطلاعات) صہیونی فوج نے فلسطین کے علاقے غزہ کی پٹی کے شمالی علاقے میں گذشتہ شب توپخانے سے گولہ باری کی ہے جس کے نتیجے میں متعدد مکانات تباہ ہو گئے ہیں۔
فلسطین نیوز کو موصول ہونے والی اطلاعات کے مطابق فوجی ذریعے کے حوالے سے بتایا ہے کہ شمالی غزہ کی پٹی میں فوج کی طرف سے توپخانے سے گولہ باری اس وقت کی گئی جب ’’نتیف حزرا‘‘ نامی فوجی کیمپ پر فائرنگ کی گئی تھی۔اسرائیلی فوج کا کہنا ہے کہ انہوں نے شمالی غزہ کی پٹی میں اسلامی تحریک مزاحمت ’’حماس‘‘ کے مراکز کو نشانہ بنایا ہے۔
ادھر شمالی غزہ کے علاقے بیت لاھیا کے شمال مشرق میں قائم القسام بریگیڈ کیمپ کے قریب دو مارٹر گولے گرنے کی تصدیق کی گئی ہے۔
اسرائیلی فوج نے دعویٰ کیا ہے کہ سرحدی علاقے میں لگائی گئی حفاظتی باڑ سے فوجی کیمپ پر فائرنگ کی گئی جس کے جواب میں گولہ باری کی گئی ہے۔ اسرائیلی فوج کی طرف سے کی گئی گولہ باری کے نتیجے میں کسی قسم کے جانی نقصان کی تصدیق نہیں ہو سکی ہے۔